Þróunarstarf á Indlandi
Hjálparstarf kirkjunnar vinnur á tveimur stöðum; Andhra Pradesh á Austur-Indlandi og Tamil Nadu á suð-austurströndinni. Myndina Upp úr öskustónni um starf Hjálparstarfsins á Indlandi (15 mín.) má sjá hér. Lengri útgáfu sem er 30 mín. má nálgast á skrifstofu Hjálparstarfsins.
Sameinaða indverska kirkjan, UCCI, er evangelísk kirkjudeild sem unnið hefur að hjálparstörfum og kristniboði í Andhra Pradesh héraði yfir 30 ár. Aðalstöðvar kirkjunnar eru í þorpinu Kethanakonda um 25 km fyrir utan borgina Vijayawada. Hjálparstarf kirkjunnar hefur starfað með UCCI í nærri 20 ár. Samstarfið hefur gengið mjög vel og forráðamenn UCCI hafa sýnt og sannað að þeir eru traustsins verðir. Sameinaða indverska kirkjan starfar á meðal þeirra lægst settu og fátækustu og rekur fjölbreytt skóla-, safnaðar- og hjálparstarf. Á annað þúsund börn njóta skólagöngu á vegum kirkjunnar og nokkur hundruð börn búa á heimavistum. Kirkjan rekur lítið sjúkrahús sem byggt var fyrir fé frá Hjálparstarfi kirkjunnar sem og leggur rekstrinum lið. Þar fá fátækir ókeypis eða mikið niðurgreidda þjónustu, geta m.a. gengist undir uppskurð sem þeir hefðu ekki haft efni á annars staðar. Læknar og hjúkrunarfólk fer einu sinni í mánuði út í þorpin og sinnir fólki sem ekki á heimangengt. Tvisvar í mánuði er deilt út mat og fatnaði til aldraðra. Smelltu hér ef þú vilt taka að þér fósturbarn á Indlandi
Nemendum í iðnnámi fjölgar stöðugt
UCCI rekur iðnskóla en slíkt nám nýtist hinum stéttlausu mjög vel. Þá geta þeir boðið fram ákveðna þekkingu en verða ekki að vinna hefðbundin störf dalíta sem ekki er greitt fyrir nema að litlu leyti í peningum heldur frekar í matarleifum. Íslenskt dagsverk studdi myndarlega við iðnskóla UCCI með framlagi 1997 og komst þá skriður á þann vísi sem til staðar var. Nú er hægt að læra sauma og klæðskurð, bifvélavirkjun, járnsmíðar, tölvunotkun auk bóklegs framhaldsnáms þannig að nemendur geti farið í háskóla.
Annar samstarfsaðili stofnunarinnar á Indlandi er Social Action Movement, SAM, sem hefur höfuðstöðvar sínar í bænum Mamandur í Tamil Nadu héraði, 70 km fyrir sunnan Chennaiborg. Smelltu hér til að skoða heimasíðu samtakanna.
Kaþólski presturinn og stjórnmálafræðingurinn P.B. Martin er stofnandi þeirra og leiðtogi þótt samtökin séu nú orðin stór og dreifð og undir stjórn sjálfstæðra leiðtoga hverrar einingar. Samtökin voru sett á laggirnar til þess að auka menntun og efla sjálfsvitund dalíta og þeirra allra lægst settu í indversku þjóðfélagi. Stofnuð hafa verið verkalýðsfélög í hefðbundnum atvinnugreinum dalíta s.s. sykureyrskurðarmanna, þvottamanna og skóara. Stéttlausum er veitt lögfræðileg aðstoð í deilumálum við stjórnvöld t.d. þegar barist er fyrir breytingum á eignarhaldi lands. Samtökin reka forskóla til að búa börn stéttlausra undir nám ekki síður en aðkast og erfiðleika sem viðbúið er að þau mæti í almenna skólakerfinu. Samtökin reka umfangsmikið verkefni til að leysa þrælabörn úr ánauð og koma þeim í skóla. Náið er unnið með foreldrum, þeir fræddir um réttindi sín og barna sinna og þeim sýnt fram á mikilvægi þess að börnin þeirra ganga í skóla. SAM rekur kvöldskóla til að búa vinnandi börn undir það að hætta í vinnu og fara í skóla. SAM vinnur mikið upplýsingastarf þessu tengt til þess að geta herjað á stjórnvöld um aðgerðir gegn barnaþrælkun. Þegar börnin eru tilbúin til að setjast á skólabekk er skuld foreldra þeirra greidd, og börnin innrituð í almenna skóla. Þar er þeim fylgt eftir vikulega svo þau heltis ekki úr námi og lendi aftur í sama fari. Samtökin hafa um árabil rekið opinn háskóla fyrir stéttlaus ungmenni. Þar hefur sérstökum þörfum þeirra verið mætt en þau eiga oft mjög litla skólagöngu að baki og hafa mjög brotna sjálfsmynd vegna stöðu sinna í samfélaginu. Satrfsemi skólans er nú að breytast og mun grunnnámi haldið áfram en flestum nemendum vísað í nýjan skóla sem kirkjan á svæðinu rekur. Þar starfar stofnandi SAM nú. Er sá skóli nær því að vera hefðbundinn og vonast er til að þar fái nemendur enn betri menntun. Starf SAM hefur í áranna ráð vaxið að umfangi og áherslur breyst í kjölfar reynslu og aðstæðna. Er það kostur samtakanna að vera í svo náinni samvinnu við fólkið sjálft að hægt er að breyta með litlum fyrirvara komi á daginn að einhver leið skili ekki tilætluðum árangri eða þarfir skapast sem verður að bregðast við.
Hjálparstarfið hefur lagt þessum samtökum lið undanfarin tæp 20 ár. Stofnunin tók þátt í að byggja miðstöð samtakanna en þar eru skrifstofur og aðstaða til námskeiðahalds. Í fjölmiðlamiðstöð SAM sem nú hefur verið lögð niður var gefið út mánaðarlegt rit um málefni dalíta á ensku og tamil, ýmis frétta- og fræðslumyndbönd um málefni dalíta.
Smelltu hér ef þú vilt taka að þér fósturbarn á Indlandi