Hjálparstarfið styður þróunarverkefni í Jijiga í Sómalí-fylki, einu hrjóstrugasta héraðinu í Eþíópíu. Verkefnið er samþætt verkefni um lífsviðurværi, svokallað „Integrated Community Development Project”. Er verkefnið það fyrsta af sínu tagi í héraðinu Jijiga. Lútherska heimssambandið eða Lutheran World Federation hefur starfað í Eþíópíu síðan 1971 en ekki áður í Somalí-fylki. Verkefnið var þróað í nánu samstarfi við íbúa og opinberar aðila í héraðinu. Það hefur skipt miklu um góðan framgang verkefnisins og byggt upp þekkingu á staðnum.

Eþíópía er sjötta fátækasta þjóð heims með um 79 milljónir íbúa. Einungis 30 % íbúa hafa aðgang að hreinu vatni sem þýðir að meira en 50 milljónir manna njóta ekki þeirra sjálfsögðu mannréttinda. Íbúafjöldi í Jijiga er áætlaður um 230.000. Ríkisstjórn Eþíópíu hefur sett Somalifylki í forgang varðandi stofnun þróunarverkefna enda er þetta eitt fátækasta fylki landsins.

Meginmarkmið verkefnisins eru fimm;

1. Að tryggja íbúum aðgang að hreinu vatni til neyslu, ræktunar og skepnuhalds með því að grafa vatnsþrær.
2. Að styrkja landbúnað með bættum ræktunaraðferðum og efla skepnuhald.
3. Að efla efnahagslegt öryggi og réttindi kvenna.
4. Að bæta heilbrigði íbúa með stofnun heilsugæslustöðvar og fræðslu um HIV/AIDS smit.
5. Að styrkja innviði og stjórnkerfi samfélagsins.

Heildarverkefnið mun nýtast öllum íbúum Jijiga héraðs sem telja 230.000. Sá hluti verkefnisins sem snýr að vatnsöflun mun tryggja 25.400 íbúum í 10 svokölluðum Kebeleum (þorpsklösum) aðgang að vatni til neyslu, ræktunar og skepnuhalds. Vatnið er þó yfirborðsvatn og er hreinsitöflum drift í gegnum viðtekið kerfi til þess að það verði hreint til drykkjar. 

Á myndinni sjást bændur úr héraðinu sem hafa verið þjálfaðir til að þekkja og meðhöndla helstu búfjársjúkdóma. Sjúkdómar eru tíðir, fóður lítið og afurðir í samræmi við það. Með hjálp þessara "dýralæknaliða" hefur ástandið breyst mikið, að þeirra sögn. Tvær konur voru þjálfaðar og þeim hefur gengið vel að fóta sig á þessu hefðbundna karlasviði. Þær njóta virðingar fyrir þekkingu sína og íbúarnir nýta þjónustu þeirra til jafns við karlanna.