Einstaklingsmiðuð nálgun og notendastýrð þjónustu eru lykilverkfæri félagsráðgjafanna sem leggja höfuðáherslu á að hlusta, ræða við og skilja einstaklingana sem til þeirra leita og vinna með þeim á forsendum þeirra sjálfra. Auk þess að veita ráð og efnislega aðstoð benda félagsráðgjafarnir fólki á úrræði í samfélaginu sem kunna að gagnast því við að takast á við erfiðar aðstæður.
Meginmarkmið með aðstoð í neyðartilfellum er að grunnþörfum fólks sé mætt, að fjárhagslegir erfiðleikar ógni ekki heilsu fólks og takmarki ekki möguleika barna og unglinga til að taka þátt í samfélaginu. Aðstoðinni er ætlað að svara skyndilegri neyð enda er það skylda stjórnvalda að tryggja framfærslu fólks í félagslegum vanda þannig að það fái lifað mannsæmandi lífi til lengri tíma. Meginreglan er sú að lögheimilisforeldar geta ekki sótt um neyðaraðstoð þá mánuði sem barnabætur eru greiddar út.
Jólaaðstoð 2025
Tekið er á móti umsóknum frá barnafjölskyldum í Reykjavík á skrifstofu Hjálparstarfs kirkjunnar, Háaleitisbraut 66, neðri hæð, dagana 27. nóvember og 28. nóvember frá klukkan 11.00 til 14:00 og eru umsækjendur beðnir um að mæta með persónuskilríki og gögn sem sýna tekjur og útgjöld síðasta mánaðar.
Opnað verður fyrir umsóknir um jólaaðstoð á netinu 24. nóvember næstkomandi. Lokað verður fyrir netumsóknir þann 10. desember. Opnað verður að nýju fyrir almennar umsóknir um neyðaraðstoð á netinu 7. janúar.
Hér að neðan er að finna umsóknareyðublað fyrir aðstoð.