Heima: Sjálfboðaliðar eru velkomnir til Hjálparstarfsins hvort sem er í eitt skipti, nokkur eða til lengri tíma. Misjafnt er hvaða verk þarf að vinna. Fatalagernum þarf að halda í horfinu, taka á móti fötum, flokka, brjóta saman og raða í hillur. Svo þarf að finna til það sem fólk vantar. Stundum fáum við leikföng sem þarf að flokka eftir aldri og setja í hillur. Oft vantar fólk í skráningu gagna og frá október og fram yfir áramót er mikil umsýsla með söfnunarbauka sem þarf að innheimta og raða í röð og ganga frá. Við höfum notið aðstoðar sjálfboðaliða við að stemma af kröfur og greiðslur, koma gjöfum sem við höfum fengið í sölu svo andvirðið megi nýta í verkefni og tölvusnillingur hefur hjálpað okkur með forritaþróun. Eins og sést eru ýmsar leiðir.

Erlendis: Hjálparstarfið er ekki með skipulögð verkefni erlendis sem sjálfboðaliðar geta tekið þátt í. Engu að síður hafa sjálfboðaliðar farið til verkefnalanda Hjálparstarfsins og dvalið allt frá nokkrum vikum til 6 mánaða. Þar hafa þeir tekið þátt í starfinu, unnið skýrslur, gert kannanir á árangri, gert stutt myndbönd fyrir okkur að setja á vefinn okkar og aðstoðað við tölvumáll. Til þess að komast út þarf viðkomandi að hafa reynslu og þekkingu sem nýtist samstarfsaðilum. Hann þarf að vera mjög sjálfstæður og fær um að búa í framandi umhverfi án mikillar aðstoðar starfsfólk úti. Sjálfboðaliðar fara á eigin kostnað og eigin ábyrgð en Hjálparstarfið kemur á sambandi og aðstoðar við að móta starfsvettvang í samvinnu við samstarfsaðila.

Hafðu samband

Ef þú hefur áhuga á að gefa okkur af tíma þínum, kröftum og þekkingu þá biðjum við þig að hafa samband við okkur. Atli Hafliðason sér um sjálfboðaliðamálin og við tökum vel á móti þér. Við munum leggja okkur fram um að kynna þér hvaða verkefni eru í boði og reyna að sjá til þess að þú njótir þín í góðum félagsskap. Þannig hafi báðir aðilar gagn og gaman af. Við störfum eftir siðareglum sem sjálfboðaliðar fá kynningu á og þeir skrifa undir þagnareið um mál og einstaklinga sem þeir hitta í starfi sínu.