Hjálparstarf kirkjunnar
Verkefni
Indland
Hjálparstarf kirkjunnar starfar með tvennum indverskum samtökum sem hvor tveggja og á ólíkan hátt stuðla að menntun og mannréttindabaráttu dalíta, hinna stéttlausu. Fósturbörn íslenskra stuðningsaðila eru hjá þessum samtökum og þau vinna líka að því að leysa þrælabörn úr ánauð og vinna með foreldrum og yfirvöldum að því að halda þeim í skóla.
Eþíópía
Hjálparstarfið og Þróunarsamvinnustofnun Íslands eru á árinu 2008 að hefja nýtt samstarfsverkefni í Eþíópíu. Verkefnið sem um ræðir er svo kallað „Integrated Community Development Project”. Eþíópía er sjötta fátækasta þjóð heims með allt að 79 milljónum íbúum. Einungis 30 % íbúa hafa aðgang að hreinu vatni sem þýðir að meira en 50 milljónir manna njóta ekki þeirra mikilvægu mannréttinda að eiga aðgang að hreinu vatni.
Mósambik
Vatnsverkefni eru fyrirferðamest í Mósambík þótt Hjálparstarfið hafi einnig stutt skóla, félagsstarf fyrir unglinga, leiðtoganámskeið fyrir konur, jarðræktarnámskeið og fleira. Brunnar sem Hjálparstarfið kostar þjóna 1000 manns í marga áratugi og leggja heimamenn fram alla vinnu við þá, viðhald og miðla fræðslu um hreinlæti og smithættu sem þeir hafa fengið frá starfsfólki Lútherska heimssambandsins sem Hjálparstarfið vinnur með á þessum slóðum.
Malaví
Hjálparstarf kirkjunnar hefur í nokkur ár starfað í Malaví með innlendum ábyrgðar- og framkvæmdaaðilum, Evangelical Lutheran Development Service, að stuðningi við sjálfsþurftarbændur. Verkefnið snýst um vatnsöflun í héraðinu Chikwawa. Sem fyrr er því ætlað að bæta lífskjör þeirra fátækustu í þessu samfélagi. Unnið er í 10 þorpum og eru fátækustu fjölskyldurnar teknar inn í verkefnið. Þær eru valdar í samvinnu við opinbert þorpsráð sem er skipað samkvæmt stefnu stjórnvalda og á að vera samhæfingaraðili í þróunarmálum hvers þorps eða svæðis. Þeir sem rækta minna en einn hektara lands, hafa orðið illa úti vegna umhverfishamfara eða sjúkdóma s.s. alnæmis ganga fyrir. Er þá tekið sérstakt tillit til þess ef einstæðar mæður standa fyrir heimilinu, munaðarlaus börn eða alnæmissjúkir. Verkefnið er unnið í samvinnu við Þróunarsamvinnustofnun Íslands. Myndasería um ferð Jónasar Þ. Þórissonar framkvæmdastjóra og Bjarna Gíslasonar upplýsingafulltrúa til Malaví febrúar 2009.
Úganda
Hjálparstarf kirkjunnar hefur um nokkurra ára skeið stutt verkefni í Úganda. Verkefnið er hluti af fjölþættu þróunarverkefni sem kirkjulegar hjálparstofnanir innan Lútherska heimssambandsins (Lutheran World Federation/World Service) reka í landinu meðal þeirra sem líða vegna alnæmis. Það er unnið í þremur héruðum: Rakaí, Lyantonde og Sembabule og snýst um að draga úr tíðni HIV-smits og áhrifum alnæmis á samfélagið. Sá hluti sem Hjálparstarfið styður snýst um að hjálpa börnum sem misst hafa báða foreldra úr alnæmi og búa ein. Áhersla er á að bæta lífsskilyrði þeirra með því að reisa handa þeim íbúðarhús með grunnhúsbúnaði og eldaskála með sérhönnuðum hlóðum sem spara eldsneyti og helstu áhöldum; auka á hreinlæti á heimilum með því að gera kamra og hreinlætisaðstöðu og fræða um samband hreinlætis og smithættu. Einnig á að auka aðgang að hreinu vatni með því að koma upp safntönkum við hús. Verkefnið er unnið í samvinnu við Þróunarsamvinnustofnun Íslands.
Mannréttindavakt
Aðalsteinn Þorvaldsson guðfræðingur og Svala Jónsdóttir fjölmiðlafræðingur dvöldu í 5 mánuði á mannréttindavakt í Palestínu frá marsmánuði 2002.
Neyðaraðstoð
Hjálparstarfið tekur þátt í neyðaraðstoð ACT Alþjóðaneyðarhjálp kirkna enda aðili að henni. ACT býr að mikilli þekkingu á þessu sérhæfða sviði og er meðal stærtu aðila í hjálparstarfi. Framlög til neyðaraðstoðar fara einnig beint til samstarfsaðila sé því að skipta.
Aðstoð innanlands
Fjöldi fólks sækir til Hjálparstarfsins um aðstoð en margir þeirra sem lifa af bótum einum saman búa við mjög kröpp kjör. Auk þess sækja margir sem af ýmsum ástæðum heyra ekki undir reglur Tryggingastofnunar eða félagsyfirvalda og eiga því ekki kost á stuðningi þaðan og í vaxandi mæli kemur láglaunafólk sem ekki nær endum saman. Veitt er neyðaraðstoð í formi matar, lyfjakaupa, fatnaðar og til kaupa á húsgöngum. Einnig er í boði langtímaaðstoð með ákveðnum skilyrðum.