Sótt er um aðstoð að Háaleitisbraut 66, í kjallara Grensáskirkju, eða hjá prestum og félagsráðgjöfum stofnana og námsráðgjöfum um land allt. Munið að koma með gögn sem sýna tekjur og gjöld og þar með þær tekjur sem eftir eru til ráðstöfunar þegar allt hefur verið greitt.Tekið er við umsónkum á miðvikudögum frá kl. 12 til kl. 16.

Hjálparstarf kirkjunnar veitir bágstöddum um allt land aðstoð, árið um kring. Félagsráðgjafi veitir innanlandsdeild Hjálparstarfsins forstöðu en tveir félagsráðgjafar eru starfandi hjá stofnuninni auk starfsmanna sem annast fatalager og fleira. Auk þeirra leggja sjálfboðaliðar starfinu lið. Tekið er á móti fólki sem sækir um og þeim veitt ráðgjöf og ýmis aðstoð eftir aðstæðum. Barnafjölskyldur geta fengið inneignarkort í matvöruverslunum en einstklingum er vísað á aðrar stofnanir varðandi mat - þar sem þær starfa. allir geta sótt um aðstoð við að leysa út lyf, fengið stuðning við skólagöngu og tómstundir barna, fatnað og fleira eftir aðstæðum. Hægt er að fá einstaklings- og fjölskylduráðgjöf, fjármálaráðgjöf og markþjálfun, allt ókeypis hjá reyndu fagfólki. Hægt er að sækja um aðstoð hjá öllum prestum landsins, félagsráðgjöfum á stofnunum og námsráðgjöfum sem koma útfylltum umsóknum til Hjálparstarfsins. Einnig er hægt að sækja um hjá Hjálparstarfinu. Öllum umsóknum þurfa að fylgja gögn sem sýna fram á tekjur og gjöld viðkomandi, sjá nánar hér. Tekið er við umsóknum á miðvikudögum kl. 12-16. Föt eru afgreidd á þriðjudögum kl. 10-12. Möguleiki er á öðrum tímum ef rík ástæða er til. Umsækjandi á samtal við félagsráðgjafa í hvert sinn sem hann kemur og leggur Hjálparstarfið áherslu á að nýta og vísa einnig í úrræði sem aðrir veita. Þannig er hægt að veita heildstæðari aðstoð. Prestar geta einnig veitt umsækjendum sem sækja um í gegnum þá, sálgæslu.. 

Jólaaðstoð

Ekki hefur verið ákveðið hvernig staðið verður að jólaaðstoð í ár en undanfarið ár hefur Hjálparstarf kirkjunnar staðið fyrir sérstakri jólaaðstoð ár hvert. Hún hefur verið í samvinnu við Reykjavíkurdeild Rauða kross Íslands og Mæðrastyrksnefnd Reykjavíkur. Nýlega hafa deildir RKÍ og mæðrastyrksnefndir í Hafnarfirði og Kópavogi bæst í hópinn og einnig Hjálpræðisherinn. Hjálparstarf kirkjunnar hefur lagt mikla áherslu á samstarf stofnana til þess að nýta betur gjafafé og vörur og koma í veg fyrir að fólk sæki sér aðstoð á fleiri en einn stað. Umsóknir til allra aðila eru samkeyrðar. Aðalúthlutun er svo sameiginleg en t.d. deila Rauða kross-deildir og mæðrastyrksnefndir í Hafnarfirði og Kópavogi út sjálfar. Einnig er deilt út á Akureyri en aðstoð á aðra staði landsins er send frá Reykjavík. 

Sjálfboðaliðar frá samtökunum, ungliðahreyfingum stjórnmálaflokka og unglingar úr æskulýðsstarfi kirkjunnar vinna mikið verk við pvörumóttöku, pakkningu og frágang. Birgjar og fyrirtæki styðja jólaúthlutunina vel með gjöfum og afslætti. 

Styrkir og samstarf

Hjálparstarfið á í samstarfi við fjölmarga aðila sem bæði miðla styrkjum innanlands í gegnum Hjálparstarfið og sem þiggja styrk frá stofnuninni. Þess nýtur fólk um land allt og á öllum aldri þ.e. bæði barnafjölskyldur, einstaklingar og ellilífeyrisþegar.

Velferðasjóður íslenskra barna hefur veitt styrki í gegnum Hjálparstarfi kirkjunnar undanfarin ár sem ætlaðir eru börnum utan Reykjavíkur. Þessar gjafir vekja mikla gleði og ánægju, hvort sem börnin velja að fara í sumarbúðir, á fótboltamót, að kaupa hjól, bretti eða fara á reiðnámskeið. Á haustin og í janúar úthlutar Hjálparstarfið einnig styrkjum frá Velferðarsjóðnum. Þeir eru til foreldra vegna útgjalda í skólabyrjun. Áhersla er einnig á að styrkja ungmenni á aldrinum 16-18 ára sem þurfa að greiða skólagjöld og bókakostnað. Reykjavíkurdeild Rauða krossins greiðir stóran hluta lyfjakaupa í gegnum Hjálparstarfið, einnig sjóðurinn Lyfjagjöf hjá Lyfjum og heilsu. Alþingi styrkti innanlandsstarfið á þessu ári og út árið er í gildi þjónustusamningur við Reykjavíkurborg um ráðgjöf og talsmannshlutverk fyrir þann hóp sem til Hjálparstarfsins leitar. Margir hafa samband fyrir jól og biðja Hjálparstarfið um að koma styrkjum til skila.