Almennt um umsóknir allan ársins hring

Aðstoð frá Hjálparstarfi kirkjunnar

Hjálparstarf kirkjunnar veitir margskonar aðstoð. Félagsráðgjafar taka á móti umsækjendum, ræða við þá og ákveða með þeim hvaða aðstoð þeim stendur til boða. Ræða þarf við félagsráðgjafa ÁÐUR en lagt er í kostnað.

Til að fá aðstoð hjá Hjálparstarfi kirkjunnar þarf að sækja um hana á skrifstofunni, hjá presti eða félagsráðgjafa á stofnunum og námsráðgjöfum. Öllum umsóknum þurfa að fylgja gögn um tekjur og útgjöld, sjá nánar hér. Þá er hægt að reikna út hversu mikið eða lítið er eftir þegar allt hefur verið greitt. Reynist umsækjandi undir viðmiði umboðsmanns skuldara getur hann fengið aðstoð. Skila þarf gögnum hvort sem sótt er um í eitt skipti eða óskað eftir lengri tíma aðstoð.

Mataraðstoð er veitt með inneignarkorti í matvöruverslanir. Á svæðum þar sem fleiri en Hjálparstarfið aðstoða með mat, t.d. á höfuðborgarsvæðinu og á Suðurnesjum, fær aðeins barnafólk þessi inneignarkort. Barnlausum er þar vísað á aðrar stofnanir. Þar sem aðeins Hjálparstarfið vinnur, fá allir mataraðstoð sem uppfylla skilyrði.

í boði er aðstoð vegna barna s.s. vegna skólabyrjunar, tómstunda og sumarnámskeiða, gleraugna o.fl. 

Framhaldsskólanemar geta fengið styrk til að greiða skólagjöld, bækur og annað sem þarf til að stunda skólann. Fullorðnir geta fengið styrk til að hefja eða ljúka námi sem ekki er lánshæft.

Hægt er að sækja um stuðning vegna lyfjakaupa. Grunnreglan er sú að styrkur er veittur vegna óvæntra útgjalda s.s. vegna sýkingar, óvæntra veikinda, breytinga á lyfjagjöf sem kalla á óvænt útgjöld. Ekki er greitt fyrir lyf sem notuð eru að staðaldri og ekki þríhyrningsmerkt lyf.

Fjölbreytt ráðgjöf er í boði, skjólstæðingum að kostnaðarlausu.

Tveir aðilar veita fjármálaráðgjöf, annars vegar tveir bankastarfsmenn sem fara í gegnum málin á forsendum banka og úrræða kerfisins. Hins vegar er aðili sem hjálpar fólki að halda utan um fjármál heimilisins, koma auga á það sem skiptir máli, hvernig megi spara og breyta viðhorfi sínu til peningamála o.fl. Hann hefur mikla reynslu af því að vinna með fólki í greiðsluerfiðleikum.

Einstaklings- og fjölskylduráðgjöf getur hjálpað til við fjölmargt s.s. að bæta samskipti innan fjölskyldunnar, taka á erfiðleikum, finna gleði og vellíðan þrátt fyrir erfiðar aðstæður. Reyndur fjölskylduráðgjafi sinnir þessum þætti.

Markþjálfun hjálpar fólki að endurskoða stöðu sína, setja sér markmið, efla sjálfstraust, fá stuðning, hvatningu og eftirfylgni. Þjálfunin er einstaklingsbundin og leiðbeinandi hefur full réttindi til að annast hana.

Við viljum hlusta

Við vitum að það er oft skammt á milli þess að geta vel séð fyrir sér og standa svo allt í einu í þeim sporum að geta það ekki. Veikindi, slys, aldur og aðrar aðstæður gera ekki allar boð á undan sér og geta verið ill viðráðanlegar. Við viljum hlusta og vera til aðstoðar og bjóðum þig velkomna / velkominn. Enginn á þó rétt á aðstoð, hún er veitt eftir mati Hjálparstarfsins.

Jólaaðstoð

Jólaaðstoð er veitt í desember. Hún er veitt í samvinnu við Mæðrastyrksnefnd Reykjavíkur, Reykjavíkurdeild Rauða kross Íslands og fleiri. Hún er ekki alltaf eins milli ára en felst yfirleitt í matvöru og jólagjöfum, stundum eru gefin gjafakort í verslanir sem fer eftir samstarfsaðilum hverju sinni. Um jólaaðstoð er sótt beint til Hjálparstarfsins eða Mæðrastyrksnefndar en ekki á báða staðina.